रोहयो अंतर्गत कोळदा येथे कामाचे उद्घाटन
नंदुरबार (प्रतिनिधी वैभव करवंदकर) :-
महात्मा गांधी रोजगार हमी योजनेच्या माध्यमातून मजुरांना आपल्या गावातच काम मिळावे, या हेतूने नंदुरबार तालुक्यातील कोळदा व दुधाळे येथे जलसंधारण दिनाचे औचित्य साधून गाव तलावातील गाळ काढण्याच्या कामाचा शुभारंभ मुख्य कार्यकारी अधिकारी विनय गौडा यांच्या हस्ते करण्यात आला.
जिल्हाभरात रोजगार हमी योजनेची विविध कामे सुरू करण्यात आली असून, मजुरांना स्थानिक पातळीवर रोजगार उपलब्ध करून दिला जात आहे. सद्यस्थितीत जिल्ह्यात 597 ग्रामपंचायतींपैकी 393 ग्रामपंचायतींमध्ये महात्मा गांधी रोजगार हमी योजनेअंतर्गत कामे सुरू आहेत. त्यात वैयक्तिक लाभाची 4 हजार 169 कामे सुरू असून, येथे 15 हजार 420 मजूर कामावर आहेत. तर 201 सार्वजनिक कामांवर 5 हजार 362 मजूर कार्यरत आहेत. अशाप्रकारे जिल्ह्यात एकूण 4370 कामांवर वीस हजार 782 मजूर उपस्थित आहेत. उर्वरित मजुरांनाही कामे उपलब्ध करुन देण्यासाठी प्रशासनाकडून ग्रामपंचायत पातळीवर प्रयत्न केले जात आहेत. मजुरांनी आपल्या ग्रामपंचायतीशी संपर्क साधून रोजगार उपलब्ध करून घ्यावा, त्याचप्रमाणे घरकुल योजनेची कामे प्रगतीपथावर असलेल्या लाभार्थ्यांनी घरकुलांची कामे पूर्ण करून घ्यावीत, असे आवाहन मुख्य कार्यकारी अधिकारी विनय गौडा यांनी केले आहे.
