हेरले पंचक्रोशीतील दिव्यांग बांधवांच्या विविध मागण्यांचे प्रशासनाला निवेदन

हेरले / प्रतिनिधी

हातकणंगले तहसीलदार कल्पना ढवळे यांना हेरले पंचक्रोशीतील दिव्यांग बांधवांच्या विविध मागण्यांचे लेखी निवेदन देण्यात आले. यावेळी तहसीलदार यांच्याशी चर्चा झाली. या चर्चेत निराधार योजनेतील पेन्शनसाठी दिव्यांग बांधवाना उत्पन्नाची अट शिथिल करावी व सर्व दिव्यांगांना रेशन कार्डवर अंत्योदय योजनेतून धान्य मिळावे या बाबत चर्चा झाली. तहसीलदार कल्पना ढवळे यांनी तालुका पुरवठा अधिकारी यांना आदेश देऊन प्रलंबित  १५ रेशन कार्ड तात्काळ देण्याच्या सूचना केल्या.

   यावेळी माजी उपसरपंच  राहुल शेटे, वेद अपंग सेवा भावी संस्थेचे अध्यक्ष  शिवाजी भोसले, अमित पाटील, सुधीर चौगुले, कपिल पाटील, अशोक राजमाने व हालोंडी, चोकाक, अतिग्रे गावचे दिव्यांग प्रतिनिधी होते.

       फोटो 

हातकणंगले तहसीलदार  कल्पना ढवळे यांना हेरले पंचक्रोशीतील दिव्यांग बांधवांच्या विविध मागण्यांचे लेखी निवेदन देतांना माजी उपसरपंच राहूल शेटे शिवाजी भोसले ,अशोक राजमानेसह  अन्य

स्पर्धा परीक्षेत विध्यार्थ्यांनी सातत्य ठेवावे : सपोनि राजेश खांडवे

    हेरले / प्रतिनिधी                   

                        

स्पर्धा परीक्षेकडे विद्यार्थ्यांचा वाढता कल आणि होत असलेली गर्दी लक्षात घेता त्यांनी स्पर्धा परीक्षेचा अभ्यास करताना सातत्य आणि चिकाटी ठेवणे गरजेचे आहे.असे प्रतिपादन शिरोली एमआयडीसी पोलीस ठाण्याचे सहाय्यक पोलीस निरीक्षक राजेश खांडवे यांनी काढले.     

     शिये (ता.करवीर) येथील ग्रामपंचायत आणि तंटामुक्त समिती यांच्या वतीने सुरु करण्यात आलेल्या एमपीएससी प्रशिक्षण वर्गाच्या उद्घाटन प्रसंगी ते बोलत होते.या प्रशिक्षण वर्गाचे उद्घाटन कार्यक्रमाच्या अध्यक्ष सरपंच रेखाताई जाधव यांच्या हस्ते करण्यात आले. तंटामुक्त समितीचे अध्यक्ष पांडुरंग पाटील प्रमुख उपस्थित होते.

      सपोनि खांडवे म्हणाले, गेल्या काही वर्षापासून स्पर्धा परीक्षेचे स्वरूप बदलले आहे.मात्र या स्पर्धा परीक्षा करणाऱ्या विध्यार्थ्यांचा टक्का देखील वाढलाय. या स्पर्धा परीक्षेत करवीर तालुक्याचा टक्का इतर तालुक्यांच्या तुलनेत कमी असल्याने हा टक्का वाढण्यासाठी शिये ग्रामपंचायत, तंटामुक्त समिती आणि गावातील सर्व संस्थांच्या वतीने ज्ञानेश्वरी हॉल येथे एमपीएससी प्रशिक्षण, मार्गदर्शन वर्गाची सुरुवात करणे गौरवास्पद आहे.       

 यावेळी सहाय्यक पोलीस निरीक्षक प्रशांत पाटील, नव्याने नियुक्त झालेले पोलीस उपधीक्षक विपुल पाटील, तहसिलदार संदीप पाटील यांनी उपस्थित विध्यार्थ्यांना स्पर्धा परीक्षेतील यशाचा कानमंत्र दिला. या प्रशिक्षण वर्गास ४० हून अधिक विध्यार्थी उपस्थित होते. 

    यावेळी पोलीस पाटील मनीषा सिसाळ, हनुमान सेवा संस्थेचे माजी चेअरमन हणमंत पाटील, महादेव दूध संस्थेचे चेअरमन किरण चौगले ,प्रभाकर काशिद, तेजस्विनी पाटील, उत्तम गाडवे, पिलाजी मगदूम,शहाजी काशीद, जगन्नाथ बुगले, बाळासाहेब माने,यशवंत मगदूम, प्रकाश पाटील प्रवीण चौगले, आप्पासो सिसाळ आदीसह विविध संस्थांचे पदाधिकारी उपस्थित होते.

    प्रास्तविक जालिंदर शिंदे यांनी केले. सुत्रसंचलन आसिफ पठाण यांनी केले.तर आभार विश्वास चरणकर यांनी मानले.

................................

फोटो : शिये : येथील एमपीएससी मार्गदर्शन वर्गाचे उद्घाटन करताना सपोनि राजेश खांडवे, सरपंच रेखाताई जाधव , तंटामुक्त समितीचे अध्यक्ष पांडुरंग पाटील व इतर मान्यवर.

छत्रपती शिवाजी विद्यानिकेतन च्या विद्यार्थ्यांची इंस्पायर अवार्ड साठी निवड

हेरले / प्रतिनिधी

छत्रपती शिवाजी विद्यानिकेतन व ज्युनियर कॉलेजच्या दोन  विद्यार्थिनींची इंस्पायर अवार्ड साठी निवड झाली आहे.

 कु. गायत्री शिवाजी अकिवाटे  इयत्ता नववी व कु भावना सागर भोसले इयत्ता सातवी यांची भारत सरकारच्या राष्ट्रीय नवप्रवर्तन प्रतिष्ठान आणि विज्ञान व तंत्रज्ञान मंत्रालयाच्या संयुक्त विद्यमाने संशोधन क्षेत्रामध्ये उत्कृष्ट नवनिर्मितीसाठी आयोजित केल्या जाणाऱ्या जिल्हास्तरीय इंस्पायर अवार्डसाठी निवड झाली.

    विद्यार्थ्यांच्या संशोधन वृत्ती व वैज्ञानिक दृष्टिकोनाचा शालेय जीवनापासून विकास व्हावा यासाठी स्पर्धेचे आयोजन केले जाते. या स्पर्धेमध्ये विविध वैज्ञानिक उपकरणे तसेच आणि सामाजिक समस्याचे निराकरण करणारे वेगवेगळे प्रकल्प सादर केले जातात.

    या यशस्वी विद्यार्थ्यांना प्रत्येकी दहा हजार रुपयाची प्रोत्साहनपर शिष्यवृत्ती जाहीर झाली  आहे.

  या विद्यार्थ्यांना संस्थेचे संस्थापक अध्यक्ष व मुख्याध्यापक माननीय श्री राजेंद्र माने सर यांचे सहकार्य लाभले तर शालेय विज्ञान विभागाचे शिक्षक श्री डोंगरे बी . ए. सर यांचे मार्गदर्शन व प्रेरणा मिळाली तसेच सर्व विज्ञान विषय शिक्षकांचे सहकार्य मिळाले.

डॉ. बी.एम.सरगर यांची प्रोफेसरपदी निवड

कोल्हापूर / प्रतिनिधी

जयसिंगपूर कॉलेज, जयसिंगपूर चे रसायशास्त्र विभागाच्या एम एस्सी या पदव्युत्तर विभागाचे प्रमुख समन्वयक डॉ.बी.एम.सरगर यांची नुकतीच शिवाजी विद्यापीठाच्या कॅस अंतर्गत प्रोफेसर या सर्वोच्च पदावरती पदोन्नती झाली. संशोधन क्षेत्रात केलेल्या उल्लेखनीय कामगिरीच्या जोरावर हे यश त्यांनी मिळविले आहे. या आधी ते सहयोगी प्राध्यापक म्हणून काम करत होते.

शिक्षण क्षेत्रात प्रोफेसर पद हे सर्वोच्च व प्रतिष्ठित मानले जाते. विद्यापीठ अनुदान आयोगाच्या निर्देशानुसार शिवाजी विद्यापीठाने नेमलेल्या तज्ज्ञ समितीच्या अहवाल व शिफारशीवरून ही पदोन्नती दिली जाते. प्रोफेसर पदासाठी विद्यापीठाकडून विविध निकष लावले जातात. यासाठी तज्ज्ञ समितीपुढे प्राध्यापकांना विशिष्ट निकषांची पूर्तता व त्यांचे संशोधन कार्य सादर करावे लागते.

प्रोफेसर डॉ. सरगर हे जयसिंगपूर कॉलेज मध्ये गेली १९ वर्षे अध्यापनाचे कार्य करीत असून सध्या ते एमएस्सी रसायनशास्त्र या विभागाचे प्रमुख समन्वयक म्हणून काम पाहत आहेत. त्यांनी आंतरराष्ट्रीय जर्नल्स मध्ये ३५ हुन अधिक शोधनिबंध प्रसिद्ध केले आहेत. सौर ऊर्जा, फोटोकॅटालायसीस, गॅस सेन्सिंग, सॉल्व्हन्ट एक्सट्रेक्शन या संशोधन क्षेत्रात त्यांनी भरीव कामगिरी केली आहे. त्यांच्या मार्गदर्शनाखाली आत्तापर्यंत २ विद्यार्थ्यांनी आपली पीएच. डी प्रबंध सादर केला आहे तर ४ विद्यार्थी पीएच डी शिक्षण घेत आहेत. तसेच ते भारतातील अनेक विद्यापीठाचे पी.एच.डी परीक्षक म्हणून काम पाहत आहेत.

डॉ. सरगर हे नेहमीच मूलभूत व समाजपयोगी संशोधनाला प्राधान्य देतात. आपल्या मार्गदर्शनाने त्यांनी कित्येक गरीब होतकरू विद्यार्थ्यांच्या अंगी असणाऱ्या गुणवत्तेला चालना दिली आहे. ग्रामीण भागामध्ये विज्ञानाचा प्रसार करण्यासाठी ते नेहमीच प्रयत्नशील असतात.

या निवडीमुळे त्यांचे सर्वच स्तरातून अभिनंदन होत आहे.

मौजे वडगाव येथील संतप्त शेतकऱ्यांनी रस्त्याचे काम बंद पाडले. गावठाण पासून रस्ता सुरु करावा या मागणीवर शेतकरी ठाम .

हेरले /प्रतिनिधी

हातकणंगले तालुक्यातील मौजे वडगाव येथील गावठाण ते पाझर तलाव रस्ता गावठाणपासून सुरू न केल्यामुळे संतप्त झालेल्या शेतकऱ्यांनी रस्त्याचे काम बंद पाडले. या अगोदर गावातील शेतकऱ्यांनी जिल्हा परिषद कोल्हापूरचे कार्यकारी अभियंता यांना रस्ता गावठाणपासून सुरु करावा अशा मागणीचे लेखी निवेदनही दिले होते. परंतु ठेकेदाराने आपली मनमानी करीत ठिकाणी अर्धवट रस्ता सुरू केला आहे. त्यामुळे शेतकऱ्यांना पडलेल्या खडी व मुरुमाचा भरावा पास करून ऊस वाहतूक करणे जिकिरीचे झाले आहे. सदर रस्त्यावर याअगोदर उसाची वाहने पलटी झाली असून वाहनांचे व शेतकऱ्यांचे मोठे नुकसान झाले आहे. ठेकेदारांना फोनवरून संपर्क साधला असता त्यांनी उडवाउडवीची उत्तरे देऊन वेळ मारून नेली आहे .

          सदर रस्त्याची सुधारणा ही गेल इंडिया कंपनीच्या सीएसआर फंडातून होत आहे. ग्रामपंचायतीच्या ठरावानुसार गावठाण ते पाझर तलाव रस्ता करण्याचे ठरले असून सदर कामाची वर्कऑर्डर तशीच आहे. परंतु गावापासून पाचशे ते सातशे मीटर अंतर सोडून रस्त्याचे काम पुन्हा सुरू केले आहे .त्यामुळे वर्क ऑर्डर नुसार काम न केल्यामुळे संतप्त झालेल्या शेतकऱ्यांनी एकत्र येऊन रस्त्याचे काम बंद पाडले .तसेच सुरुवातीपासून काम चालू करा अन्यथा काम करू देणार नाही असा आक्रमक पवित्रा शेतकऱ्यांनी घेतला.

        यावेळी मनोहर चौगले, बाळासो थोरवत, शिवसेनेचे शहर प्रमुख सुरेश कांबरे, विलास सावंत, भुपाल चौगुले ,गुणधर परमाज, विलास येलाज, शितल परमाज, तानाजी सावंत ,स्वप्नील चौगुले, बाळासो पाटील, गणपती कदम, दगडू थोरवत, अमर सावंत, यांच्यासह शेतकरी वर्ग मोठ्या संख्येने उपस्थित होता.

         प्रतिक्रिया

 गावठाण ते पाझर तलाव रस्ता गावठाण पासून सुरु करावा सुरुवातीपासून रस्ता चालू न केल्यास पुढचा रस्ता सुरू करू देणार नाही .

   मनोहर चौगले - शेतकरी

        प्रतिक्रिया

 ठेकेदार जरी रस्त्या संदर्भात वर्क ऑर्डर नुसार रस्त्याचे काम करीत नसेल व प्रशासनाचा  आदेश मानत नसेल तर त्या ठेकेदाराला काळया यादीत  टाका. 

    माजी उपसरपंच सुरेश कांबरे -शिवसेना शहर प्रमुख

 

 

हातकणंगले तालुक्यातील मौजे वडगांव येथील संतप्त झालेल्या शेतकऱ्यांनी रोलर आडवून रस्त्याचे काम बंद पाडले.

शिक्षकांनी त्यांची शक्ती, युक्ती आणि सक्ती केली नसती तर गुणवंतांची यशस्वी बॅच घडली नसती.- - नागाव हायस्कूल माजी विद्यार्थ्यांच्या भावना.

कोल्हापूर / प्रतिनिधी

शिक्षकांनी त्यांची शक्ती, युक्ती आणि सक्ती केली नसती तर गुणवंतांची यशस्वी बॅच घडली नसती. नागाव हायस्कूल नागावच्या सन १९९२ - ९३ सालच्या दहावीच्या बॅचच्या माजी विद्यार्थ्यांच्या या भावना.  वयाची साठी पार केलेले शिक्षक आणि त्रेचाळीस पार विद्यार्थी - विद्यार्थीनींंच्या  तब्बल अठ्ठावीस वर्षानंतर जमलेल्या स्नेहमेळाव्यात व्यक्त झाल्या. कोल्हापूर येथील हाॅटेल पॅव्हिलियन येथे हा कार्यक्रम झाला. 

विद्यार्थी आमच्यापेक्षाही जास्त शिकले आणि आपापल्या क्षेत्रात ते यशस्वी ठरले यापेक्षा आणखी मोठी गुरुदक्षिणा एका शिक्षकासाठी असू शकत नाही, असे मत निवृत्त मुख्याध्यापक अशोक मुंडे यांनी व्यक्त केले. आमचे विद्यार्थी डॉक्टर, इंजिनियर, उद्योजक, व्यापारी, शिक्षक, प्राध्यापक, तसेच विविध क्षेत्रात कर्तबगार बनले हे पाहून आपणास समाधान मिळाले असल्याचे त्यांनी सांगितले. 

शिक्षणात मन रमत नव्हते. म्हणून शाळेत जाणे बंद केले. पण त्यावेळी शिक्षकांनी जबरदस्तीने शाळेत नेले. अगदी पेनापासून लागणारे साहित्य दिले. म्हणूनच आज आपण रत्नाकर बँकेच्या वरिष्ठ अधिकारी पदापर्यंत पोहचू शकलो असे राजेंद्र बेळंके यांनी सांगितले. 

साम, दाम, दंड, भेद या चतूसुत्रीचा वापर करून शिक्षकांनी अभ्यास करून घेतला. त्यामुळे एक शिक्षक म्हणून कार्यरत असताना विद्यार्थ्यांना हाताळणे कठीण जात नाही, असे शोभा कांबळे यांनी सांगितले. 

शिक्षणाचा पाया भक्कम झाल्याने उद्योग - व्यापार आणि राजकीय क्षेत्रात आपण यशस्वी ठरलो असे पंचायत समिती सदस्य उत्तम सावंत यांनी सांगितले. 

यावेळी ए. के. चौगले, आर. टी. चौगुले, श्री. ठिकणे, श्री. कांबळे, सौ. स्वामी, सौ. चौगले,  प्रकाश लंबे आदी शिक्षकवृंद उपस्थित होते. 

पोलिसपाटील बाबासो पाटील, संदिप पाटील, शितल पाटील, सुनील सावंत, प्रविण चौगुले, माणतू कोळी, शिवाजी हराळे, सुनिल नागावकर, माणिक नागावकर, मिलिंद जोशी, अभिजित कुलकर्णी, सागर पाटील,  वैशाली मगदूम, रेशमा राजहंस, माधवी लंबे, अर्चना शिरगावे, सरिता लंबे, संगिता यादव, मनिषा यादव,    आदी उपस्थित होते. 

डॉ. धनाजी घाटगे यांनी स्वागत व सूत्रसंचालन केले. 

संगीता बोरगावे यांनी प्रास्ताविक केले. 

गोविंद नागावकर यांनी आभार मानले. 

.......................

फोटो

नागाव : स्नेहमेळाव्यास उपस्थित शिक्षक व माजी विद्यार्थी - विद्यार्थीनी 

.........................................................................................

छत्रपती शिवाजी विद्यानिकेतनमध्ये सह्याद्री वार्षिक क्रीडा महोत्सवाचे शानदार उद्घाटन.

पेठ वडगाव / प्रतिनिधी

        

  सह्याद्री एज्युकेशन सोसायटी अंबप संचलीत छत्रपती शिवाजी विद्यानिकेतन व ज्युनियर कॉलेज पेठ वडगाव व दिशा इंग्लिश मीडियम स्कूल पेठ वडगाव या प्रशालेचा शैक्षणिक वर्ष 2021 / 22 साल चा वार्षिक क्रीडा महोत्सवाचा उद्घाटन सोहळा दिमाखात पार पडला

कार्यक्रमाची सुरुवात प्रमुख पाहुण्यांच्या हस्ते श्रीफळ वाढवून दीपप्रज्वलनाने व क्रीडा ज्योतीच्या व शस्त्र पूजनाने झाली. 

   प्रमुख पाहुणे एम.आय.डी.सी. शिरोली पोलीस ठाण्याचे प्रमुख सहाय्यक पोलीस निरीक्षक  राजेश खांडवे म्हणाले गरीबीचे चटके सोसलेले व आई-वडील यांच्या कष्टाची जाणीव असणारी व्यक्ती जीवनात कधीही वाया जात नाही.  खेळातून मनुष्य शारीरिक आणि मानसिक दृष्ट्या सक्षम होतो त्यामुळे आयुष्यातील संकटाला सामोरे जाताना आपणाला बळ देतात. त्यांनी आपल्या पोलीस सेवेतील काही चित्तथरारक अनुभवाचे उदाहरणेही दिली.

    प्रशालेच्या विद्यार्थ्यांनी सुरेख कवायत संचलनाच्या माध्यमातून  उपस्थित मान्यवरांना मानवंदना दिली. त्यानंतर प्रशालेच्या विद्यार्थ्यांनी सादर केलेल्या कुस्ती मल्लखांब कराटे रोप स्किपिंग व लाटीकाठीच्या चित्तथरारक प्रात्यक्षिके आणि सर्वच उपस्थितांची मने जिंकली.

   कार्यक्रमाचे प्रमुख पाहुणे महाराष्ट्र केसरी शिवछत्रपती पुरस्कार विजेते पैलवान  विष्णू जोशीलकर विद्यार्थ्यांना उद्देशून म्हणाले की, आयुष्यात खडतर प्रसंगांना आत्मविश्वासाने सामोरे जा कोणत्याही परिस्थितीत यश तुमचेच असेल.

    कार्यक्रमाचे अध्यक्ष संस्थेचे संस्थापक अध्यक्ष तथा मुख्याध्यापक  राजेंद्र माने यांनी आपल्या भाषणातून प्रशालेच्या खेळाची दैदिप्यमान  अशी परंपरा सांगत विद्यार्थ्यांच्या सर्वांगीण विकासासाठी तसेच उत्तम करियर घडवण्याचा राजमार्ग या अनुषंगाने खेळाचे महत्व पटवून सांगितले.

     कार्यक्रमास राष्ट्रीय कुस्ती खेळाडू  जयदीप जोशिलकर,  मिणचे सरपंच रंजना जाधव,उपसरपंच अभिनंदन शिखरे, संस्थेचे खजानीस  बापुसो माने, क्रीडा महोत्सव प्रमुख  सागर आवळे, प्रशालेचे विभाग प्रमुख सासणे, एम आर पाटील, किशोर इंगळे, बाजीराव डोंगरे, जिमखाना प्रमुख  आनंद पाटील, दिशा इंग्लिश मीडियम स्कूल क्रीडा प्रमुख पी के चौगुले , शिक्षक वृंद, शिक्षकेतर कर्मचारी, विद्यार्थी विद्यार्थिनी आदी कार्यक्रमास उपस्थितीत होते.  सूत्रसंचालन  एस.जे.सासणे व एम आर पाटील यांनी केले तर आनंद पाटील  यांनी  आभार मानले.

      फोटो 

छत्रपती शिवाजी व विद्यानिकेतन व जुनिअर कॉलेज पेठ वडगाव व दिशा इंग्लिश मीडियम स्कूल पेठ वडगाव या प्रशालेत सह्याद्री वार्षिक क्रीडा महोत्सव चे उद्घाटन प्रसंगी महाराष्ट्र केसरी पैलवान विष्णू जोशीलकर यांचा सत्कार करतांना संस्थेचे अध्यक्ष राजेंद्र माने सपोनि राजेश खांडवे व मान्यवर.

कठोर परिश्रम हाच क्रीडा स्पर्धेतील यशाचा गुरुमंत्र आहे-आंतरराष्ट्रीय खेळाडू अभिज्ञा पाटील.

पेठ वडगाव / प्रतिनिधी

    हातकणंगले तालुक्यातील मिणचे येथील आदर्श विद्यानिकेतन ॲण्ड ज्युनियर कॉलेज मिणचे या प्रशालेचाच्या वार्षिक क्रीडा महोत्सवाचे उद्घाटन उत्साहात संपन्न झाले.

   या कार्यक्रमास आंतरराष्ट्रीय नेमबाज  अभिज्ञा पाटील, राष्ट्रीय खेळाडू दीपक बागल, सोएब शिकलगार, अक्षय जाधव, बॉडी बिल्डर शिवप्रसाद सातपुते संस्थेचे संस्थापक अध्यक्ष डॉ. डी. एस. घुगरे, सचिव एम. ए. परीट, क्रीडा विभाग प्रमुख  शिवाजी पाटील यांची प्रमुख उपस्थिती होती.

      प्रशालेतील राष्ट्रीय खेळाडू हर्षवर्धन केकेले, पार्थ खोत, अथर्व साळवे या खेळाडूंनी आणलेल्या क्रीडा ज्योतीचे पूजन मान्यवरांच्या शुभहस्ते करण्यात आले. सर्व खेळाडूंना अमरिष बहिरगौडे यांनी क्रीडा शपथ दिली. उद्घाटन प्रसंगी कुस्ती, आर्चरी, मलखांब, योगा व बॉडी बिल्डिंगचे चित्तथरारक प्रात्यक्षिके विद्यालयातील विद्यार्थ्यांनी सादर केली.

           कार्यक्रमाचे प्रास्ताविक व  क्रीडा विभागाचा अहवाल जिमखाना प्रमुख शिवाजी पाटील यांनी सादर केला. आपल्या मनोगतातून आंतरराष्ट्रीय नेमबाज अभिज्ञा पाटील ने आंतरराष्ट्रीय स्पर्धेतील सुवर्णपदका  पर्यंतचा प्रवास कसा खडतर होता व कठोर परिश्रमाशिवाय ते साध्य करता आला नसता हे आपल्या मनोगतातून विद्यार्थ्यांना सांगितला व वार्षिक क्रीडा महोत्सव साठी शुभेच्छा दिल्या. प्रशालेचे माजी विद्यार्थी व  राष्ट्रीय व्हॉलीबॉल खेळाडू शिकलगार यांनी मैदानावरील अनुभवांचा जीवन प्रवासात पावलोपावली उपयोग होतो हे नमूद केले. इचलकंजी येथील प्रसिद्ध बॉडी बिल्डर शिवप्रसाद सातपुते यांनी आपल्या खेळाडूंना सोबत घेत बॉडी बिल्डींगची चित्तथरारक प्रात्यक्षिके व महत्त्व विशद केले.

    संस्थेचे अध्यक्ष डॉ. डी. एस. घुगरे यांनी  प्रशासनाच्यावतीने विद्यालयांमध्ये चांगल्या क्रीडा सुविधा उपलब्ध करून देण्याचे अभिवचन दिले. कार्यक्रमाचे आभार डॉ. डी. एम. शेटे यांनी मानले. या कार्यक्रमास संस्थेचे उपाध्यक्ष प्रदीप तोडकर, शिक्षक, शिक्षकेतर कर्मचारी व विद्यार्थी उपस्थित होते. कार्यक्रमाचे थेट प्रक्षेपण गुगल मीट द्वारा पालका पर्यंत पोचवण्यात आले.

        फोटो 

 वार्षिक क्रीडा महोत्सवाचे उद्घाटन प्रसंगी ज्योत प्रज्वलीत करतांना आंतरराष्ट्रीय नेमबाज अभिज्ञा पाटील, राष्ट्रीय खेळाडू दीपक बागल, सोएब शिकलगार, अक्षय जाधव, बॉडी बिल्डर शिवप्रसाद सातपुते संस्थेचे संस्थापक अध्यक्ष डॉ. डी. एस. घुगरे, सचिव एम. ए. परीट, क्रीडा विभाग प्रमुख  शिवाजी पाटील आदी मान्यवर.

शिक्षकांनी आण्णांच्या संस्काराचा आदर राखावा. डॉ अजितकुमार पाटील

**

कोल्हापूर प्रतिनिधी 

महाराष्ट्र राज्य शिक्षक संघाचे अखिल भारतीय प्राथमिक शिक्षक संघाचे अध्यक्ष कै शिवाजीराव पाटील उर्फ आण्णा यांच्या द्वितीय पुण्यतिथी निमित्ताने शहर शाखा शेठ रुईया विद्यालय कोल्हापूर मध्ये शिक्षक संघाचे सेवानिवृत्त अध्यक्ष वसंतराव चव्हाण यांच्या हस्ते व पदाधिकारी यांच्या उपस्थितीत अण्णांच्या प्रतिमेस पुष्पहार अर्पण करण्यात आला व शेठ रुईया विद्यालयात विद्यार्थ्यांना वही वाटप करण्यात आल्या.

अध्यक्षस्थानी वसंतराव चव्हाण, नामदेव बरगे,संघाचे विद्यमान अध्यक्ष मनोहर सरगर,संदीप सुतार,सुनील गणबावले, डॉ अजितकुमार पाटील,कमलाकर काटे,प्रमोद गायकवाड, राजेंद्र पाटील, कुलदीप जठार, विजय सुतार, नामदेव वाघ,सुभाष मराठे,अशोक जोग,सुनील कोळी,तानाजी इंदुलकर, दिलीप माने,श्रीकांत हुबाले, राहुल बागडी आदी  पदाधिकारी यांच्या प्रमुख उपस्थितीत पुण्यतिथी स्मरण करण्यात आले.

प्रसंगी शाळेतील विद्यार्थ्यांना मान्यवरांच्या हस्ते वह्या वाटप करण्यात येऊन डॉ अजितकुमार पाटील यांनी *शिक्षक महर्षी शिवाजीराव पाटील आण्णा* यांच्या जीवनकार्याचा शैक्षणिक व संघटनात्मक कार्याचा वेध घेणारा *साप्ताहिक शोध*

या वैचारिक अंकाचे प्रकाशन मान्यवरांच्या शुभ हस्ते करण्यात आले.

डॉ अजितकुमार पाटील यांनी या लेखांमधून शिवाजीराव पाटील आण्णा यांच्या जीवनकार्याची माहिती देत असतांना नेतृत्व गुण,संघटना चातुर्य,चौफेर ज्ञान,कसे असावे व शासन दरबारी प्रश्न कसे मांडावेत याबद्दल मनोगत व्यक्त केले.अण्णांच्या संस्काररुपी वसा एकविसाव्या शतकातील कार्यकर्ते शिक्षक, पदाधिकारी यांनी कसे जपावेत व संस्कारांची गरज कशी आहे ते मत  व्यक्त केले.

सेवानिवृत्त संघटनाचे वसंतराव चव्हाण यांनी शिक्षक अधिवेशनात अण्णांचा आवाज व विचार कसे होते त्यांच्या रत्नागिरी,शिर्डी, दिल्ली,अहमदनगर, सांगली, व इतर ठिकाणी झालेल्या शिक्षक अधिवेशनातील कार्याची माहिती व विचार व्यक्त केले.

कार्यक्रमाचे सूत्र संचालन संदीप सुतार व विजय सुतार यांनी केले तर आभार मनोहर सरगर यांनी मानले.

हेरले येथे महावितरणवर मोर्चा

हेरले / प्रतिनिधी

   सन 2020 व 2021 या दोन वर्षांमध्ये कोरोनाची जागतिक महामारी आपल्या हेरले परिसरात अतिवृष्टी व महापुरामुळे शेती पिकांचे फार मोठे नुकसान झाले आहे. बऱ्याच लोकांचे रोजगार व नोकरी गेली आहे.त्यामुळे सर्वच कुटुंबातील आर्थिक गणित कोलमडली आहेत.त्यामध्येच महावितरण कंपनीने अन्यायकारक वीज दरवाढ केली आहे व मनमानी पध्दतीने वीज कनेक्शन तोडले  जात आहे.त्याविरोधात हेरले ( ता. हातकणंगले) येथील सर्व पक्षीय कृती समिती व युवा स्वाभिमानी शेतकरी संघटनेच्या वतीने मोर्चा काढून लेखी निवेदन महावितरणचे हेरले कनिष्ठ अभियांता संदीप कांबळे यांना देण्यात आले.

    लेखी निवेदनाचा आशय असा की

 घरगुती वीज बिलामधील दंड व्याज आकारणी रद्द करण्यात यावी,

अन्यायकारक वाढविलेला स्थिर आकार व १६%वीज शुल्क यामध्ये कपात करणेत यावी,ताबडतोब वीज तोडणी बंद करण्यात यावी,शेती वीज बिलासाठी कृषी संजीवनी योजनेला डिसेंबर 2022 पर्यंत मुदत वाढ देणेत यावी,शेतामधील वीज पूर्ववत दिवस व रात्र पाळी मध्ये १० तास करणेत यावी.या सर्व बाबींचा विचार करून महावितरण कंपनी ने ताबडतोब निर्णय घ्यावा अन्यथा उग्र आंदोलन करणेत येईल असा लेखी निवेदनाद्वारा इशारा देण्यात आला. 

     या प्रसंगी माजी सभापती राजेश पाटील,स्वाभिमानी शेतकरी संघटना युवा आघाडी जिल्हा उपाध्यक्ष शुभम मोरे,हातकणंगले तालुका सरचिटणीस मुनिर जमादार,कुमार इंगळे,डी एन पाटील उपसरपंच फरीद नायकवडी, शिव सेनेचे माजी उपसरपंच विजय भोसले, माजी उपसरपंच संदीप चौगुले,राहुल शेटे,दादासो कोळेकर, मज्जीद लोखंडे, शिवराज घेवारी, राजू खोत,इसुब पेंढारी, साजिद नायकवडी, संतोष उलस्वार, दादासो भोसले, श्वेतांबर रुईकर आदी उपस्थित होते.

       

लेखी निवेदनाद्वारे मागणी केलेल्या मागण्या महावितरण च्या वरिष्ठ अधिकारांच्याकडे पाठवित आहे. यामधून योग्य निर्णय होण्यासाठी प्रयत्नशील आहे असे आश्वासन हेरले कनिष्ठ अभियांता संदीप कांबळे यांनी दिले.

      फोटो 

हेरले ( ता. हातकणंगले) येथील सर्व पक्षीय कृती समिती व युवा स्वाभिमानी शेतकरी संघटनेच्या वतीने पदाधिकाऱ्यांनी मोर्चा काढून विविध मागण्यांचे लेखी निवेदन महावितरणचे हेरले कनिष्ठ अभियंता संदीप कांबळे यांना देतांना शुभम मोरे  माजी सभापती राजेश पाटील मुनिर जमादार व अन्य पदाधिकारी.

शासनाच्या सर्व सोई सुविधा दिव्यांगापर्यंत पोहचविणार - जि.प. सदस्या डॉ पद्माराणी पाटील

हेरले / प्रतिनिधी

    शासनाच्या सर्व सोई सुविधा दिव्यांगापर्यंत पोहचविणार असे प्रतिपादन माजी सभापती जि.प. सदस्या डॉ पद्माराणी पाटील यांनी  केले त्या हातकणंगले तालुक्यातील हेरले  येथे वेद अपंग सेवाभावी संस्थेने जागतीक अपंग दिना निमित्त आयोजित केलेल्या कार्यक्रमात  बोलत होत्या. अध्यक्षस्थानी हातकणंगले पंचायत समितीचे सहाय्यक गटविकासअधिकारी  विजय देशमुख होते.

   सहाय्यक गटविकास अधिकारी विजय देशमुख म्हणाले,संस्थेला प्रशासनाचे पुर्ण सहकार्य देण्यात येईल.अपंगांना ग्रामपंचायत न घरफाळा आणि पाणीपट्टीत सवलत द्यावी.

यावेळी ग्रामपंचायत स्वनिधीतुन अपंगांना 5% निधी धनादेश वाटप करण्यात आले.हेरले डाँक्टर असोशिएशनने आपल्या  खाजगी दवाखान्यात पन्नास टक्के सुट दिव्यांगांना जाहीर केली  आहे. 

      यावेळी सरचिटणीस मुनिर जमादार , वैद्यकिय अधिकारी डॉ.राहुल देशमुख ,माजी उपसरपंच राहुल शेटे ग्रामपंचायत सदस्य निलोफर खतीब , दादासो कोळेकर ,ग्रामसेवक संतोष चव्हाण वेद संस्थेचे अध्यक्ष शिवाजी भोसले यांनी मनोगते व्यक्त केली.

  या कार्यक्रमास वेद अपंग सेवाभावी संस्था हेरलेचे  अध्यक्ष  शिवाजी भोसले , उपाध्यक्ष अमित पाटील,

सदस्य  संदीप पाटील ,संजय शेंडगे हाशिम मुलाणी, सुरेश चोगुले ,सुरेश मगदूम ,उज्वला परमाज, दीपाली माकणे ,भाग्यश्री जाधव ,संदिप पाटील  यांचेसह सदस्य उपस्थित होते.

फोटो :- जागतीक अपंग दिना निमित्त कार्यक्रमामध्ये बोलताना  माजी सभापती जि.प. सदस्या डॉ पद्माराणी पाटील शेजारी मुनिर जमादार, डॉ.राहुल देशमुख व अन्य मान्यवर.

रांगोळी स्पर्धेत शाहूंच्या विद्यार्थ्यांचे सुयश

** कोल्हापूर प्रतिनिधी 

कोल्हापूर महानगरपालिका प्राथमिक शिक्षण समिती संचलित मनपा राजर्षी शाहू विद्या मंदिर शाळा क्र 11,सेंट्रल स्कुल कसबा बावडा मध्ये भारतीय स्वातंत्र्याच्या सुवर्ण महोत्सव व दिव्यांग सप्ताहानिमित्त भव्य रांगोळी स्पर्धा आयोजित करण्यात आली होती रांगोळी स्पर्धेचे उद्घाटन कसबा बावड्यातील सामाजिक कार्यकर्ते गजानन बेडेकर प्राथमिक शिक्षण समितीचे पी आर ओ रसूल पाटील शैक्षणिक पर्यवेक्षक विजय माळी प्राथमिक शिक्षक संघाचे अध्यक्ष मनोहर सरगर जिल्हा समन्वयक शकीला मुजावर राजेंद्र अप्पूगडे सामाजिक कार्यकर्ते सचिन चौगुले यांच्या प्रमुख उपस्थितीत संपन्न झाले .

 कार्यक्रमामध्ये रसूल पाटील यांनी दिव्यांग विद्यार्थ्यांना इतर विद्यार्थ्यांच्या बरोबर न्याय देण्याचे महत्वाचे आहे असे मनोगत व्यक्त केले गजानन बेडेकर यांनी विद्यार्थ्यांना शुभेच्छा दिल्या व शाळेच्या प्रत्येक स्पर्धेमध्ये विद्यार्थ्यांनी सहभाग घ्यावा व आपल्या शाळेचे नाव उज्वल करावे असे त्यांनी आवाहन केंद्र शाळेचे मुख्याध्यापक डॉ अजितकुमार पाटील यांनी दिव्यांग विद्यार्थ्यांनी रांगोळी स्पर्धेत सहभाग घेतल्याबद्दल विद्यार्थ्यांचे कौतुक केले व पालकांची सुद्धा कौतुक केले समाजामध्ये वावरत असताना भारतीय स्वातंत्र्याच्या सुवर्ण दिनानिमित्त या रांगोळी स्पर्धेचे आयोजन करण्यात आले असून त्यामध्ये सर्व सामान्य विद्यार्थ्यांच्या बरोबर सुद्धा दिव्यांग विद्यार्थ्यांना न्याय देण्याचे कार्य अत्यंत महत्त्वाचे आहे भारतीय राज्यघटना नुसार न्याय स्वातंत्र्य समता बंधुता सर्वधर्मसमभाव हक्क या संविधानाचा आदर राखून पहिली ते सातवीतील  विद्यार्थ्यांना सर्वसमावेशक न्याय द्यायचे कार्य शाळा करत आहे त्यामध्ये आमच्या शाळेचे सर्व शिक्षक माजी विद्यार्थी मित्र मंडळाचे अध्यक्ष पदाधिकारी समितीचे सदस्य खरोखरच विद्यार्थ्यांना न्याय देण्याचे कार्य करत आहेत याचा मला अभिमान आहे असे मनोगत डॉ अजितकुमार पाटील यांनी व्यक्त केले. 

यशस्वी विद्यार्थ्यांचे अभिनंदन करून प्रथम क्रमांक वेदांतिका पाटील द्वितीय क्रमांक पल्लवी कोरवी तृतीय क्रमांक तेजस्विनी माने उत्तेजनार्थ जानवी ताटे व आदिती बिरंगे यांनी संपादन केले सर्व सहभागी स्पर्धकांना रसूल पाटील मनोहर सरगर गजानन बेडेकर राजेंद्र अप्पूगडे सचिन चौगुले या इतर मान्यवरांच्या हस्ते वही व पेन देऊन सत्कार करण्यात आला या कार्यक्रमासाठी शाळेतील ज्येष्ठ शिक्षक उत्तम कुंभार सुशील जाधव शिवशंभु गाटे आसमा तांबोळी तमेजा मुजावर विद्या पाटील हेमंत कुमार पाटोळे शाळा व्यवस्थापन सदस्य अनुराधा गायकवाड सोनाली जामदार दिपाली चौगुले स्नेहा दाभाडे शिक्षण तज्ञ मुजावर उपस्थित होते परीक्षक म्हणून सुरेखा पाटील जयश्री पुजारी सुनिता अंबाडेकर यांनी काम पाहिले तर आभार उत्तम कुंभार यांनी मानले कार्यक्रमाच्या यशस्वीतेसाठी शाळेतील विद्यार्थी-विद्यार्थिनींनी सहकार्य केले.

जिल्हा बँकेसाठी शिवसेना शहर प्रमुख सुरेश कांबरे यांचा उमेदवारी अर्ज दाखल.

: अनुसूचित जाती प्रवर्गातून दावेदारी :

 हेरले / प्रतिनिधी  

मौजे वडगाव येथील शिवसेना शहर प्रमुख व माजी उपसरपंच सुरेश कांबरे यांनी जिल्हा मध्यवर्ती सहकारी बँकेच्या निवडणुकीसाठी अनुसूचित जाती या प्रवर्गातून आपला उमेदवारी अर्ज दाखल केला. 

      जिल्हा बँकेच्या कार्यालयातील निवडणूक निर्णय अधिकारी यांच्याकडे शिवसेना जिल्हाप्रमुख  मुरलीधर जाधव यांच्या सूचनेनुसार व शिवसेना पदाधिकारी यांचे उपस्थित अर्ज दाखल केला. हिंदुहृदय सम्राट शिवसेनाप्रमुख श्रीमान बाळासाहेब ठाकरे व महाराष्ट्राचे मुख्यमंत्री  उद्धवजी ठाकरे यांच्या शिकवणीनुसार ८० टक्के समाजकारण व २० टक्के राजकारण या सूत्रानुसार शिवसेना सदैव कार्यरत आहे. त्या अनुषंगाने मी केलेल्या माझ्या कामाची पोचपावती म्हणून मला निश्चितपणे शिवसेनेची उमेदवारी मिळेल अशी भावना त्यांनी व्यक्त केली .

      याप्रसंगी शिवसेना जिल्हाप्रमुख मुरलीधर जाधव, उपजिल्हाप्रमुख साताप्पा भवान, शिव सहकार सेना जिल्हा संघटक संजय जाधव, तालुका संघटक संदीप दबडे, रमेश शिंदे, पाणीपुरवठा संस्थेचे चेअरमन धोंडीराम चौगुले, बाळासो थोरवत, ग्रा.पं .सदस्य अवधूत मुसळे ,अविनाश पाटील, महादेव शिंदे ,सुनील खारेपाटणे, स्वप्नील चौगुले, अमोल झांबरे, अण्णासो पाटील, व इतर मान्यवर उपस्थित होते.

 फोटो 

   शिवसेना शहर प्रमुख माजी उपसरपंच सुरेश कांबरे यांनी जिल्हा बँकेसाठी आपला उमेदवारी अर्ज दाखल केला. यावेळी जिल्हाप्रमुख  मुरलीधर जाधव, उपजिल्हा प्रमुख साताप्पा भवान, संजय जाधव, संदीप दबडे ,व इतर मान्यवर उपस्थित होते.

कोजिमाशि पतसंस्थेकडून सभासदांसाठी १० लाख रुपयांची अपघात विमा योजना जाहीर

*.* 

पेठ वडगांव / प्रतिनिधी

मिलींद बारवडे 

कोल्हापूर जिल्हा माध्यमिक शिक्षण सेवकांची सहकारी पतसंस्थेच्या सुमारे ८८३६ सभासदांना १० लाख रुपये विमा कवच असणारी अपघात विमा योजना दिनांक ११ नोव्हेंबर २०२१ पासून १ वर्षासाठी कार्यान्वित राहील. या अपघात विमा योजनेतून संस्थेच्या सभासदांसाठी ८८३ कोटी ६० लाख रुपये इतके विमा कवच  लागू राहील. सदर विम्याची  प्रीमियम रक्कम कोजिमाशि पतसंस्थेमार्फत  भरली आहे अशी माहिती कोजिमाशि  पतसंस्थेचे तज्ज्ञ संचालक दादासाहेब लाड यांनी दिली. पतसंस्थेच्या शाहूपुरी येथील प्रधान कार्यालयात न्यू इंडिया इन्शुरन्स कंपनीचे अधिकारी श्री.आनंद कुलकर्णी, ब्रँच मॅनेजर श्रीकांत कोले व सल्लागार  योगेश सकट यांनी कोजिमाशि पतसंस्थेचे चेअरमन बाळ डेळेकर,व्हा.चेअरमन सुभाष पाटील,सीईओ अरविंद पाटील यांचेकडे अपघात विमा पॉलिसी सुपूर्द केली.याप्रसंगी कोजिमाशिचे संचालक कैलास सुतार, अनिल चव्हाण,संदीप पाटील,सौ.सुलोचना कोळी,उपमुख्य कार्यकारी अधिकारी जयवंत कुरडे,संगणक  अधिकारी नितीन शिंदे,प्रशासन अधिकारी उत्तम कवडे आदी उपस्थित होते. सदरच्या अपघात विमा योजनेनुसार अपघाती मृत्यू झाल्यास त्यांच्या वारसांना १० लाख रुपयांचा  लाभ दिला जाणार आहे. तसेच अंशतः अपंगत्व आल्यास म्हणजे  एक डोळा,एक हात किंवा एक पाय निकामी झाल्यास ५ लाख रुपये विमा कवच सभासदांना मिळणार आहे. सदरची योजना कोजिमाशि पतसंस्थेच्या सभासदांना वरदान ठरणार आहे अशी माहिती चेअरमन बाळ डेळेकर यांनी दिली.सभासदांकडून कोणतीही विमा हप्ता रक्कम भरून न घेता या अपघात विमा  योजनेची संपूर्ण रक्कम कोजिमाशि पतसंस्था स्वतः भरणार आहे हे या योजनेचे वैशिट्य मानावे लागले.स्वतः विम्याची रक्कम भरणारी कोजिमाशि पतसंस्था ही जिल्ह्यातील पहिली संस्था ठरली आहे.