कागल / प्रतिनिधी
शिक्षण प्रसारक मंडळ कोल्हापूर संचलित श्री शाहू हायस्कूल ज्युनिअर कॉलेज, कागल येथे रोटरी क्लब कोल्हापूर मिडटाऊन व नायजेरियन क्लब यांच्यामार्फत रोटरी क्लब वर्धापनदिनाचे औचित्य साधून मुलींच्या स्वच्छतागृहाचे उद्घाटन करण्यात आले.
समाजात अशा अनेक व्यक्ती आहेत ज्यांना आधाराची आवश्यकता असते. त्यांच्यासाठी कुणीतरी पुढे येऊन हात देण्याची आवश्यकता असते. अशा व्यक्तींच्या उन्नतीसाठी रोटरी क्लब सदैव अग्रेसर असतो. अनेक व्यक्तींना मदत करून सामाजिक कार्य करण्याचा प्रयत्न क्लबच्या माध्यमातून केला जातो. या ठिकाणीही मुलींच्या आरोग्यविषयक अडचणी दूर करण्यासाठी सर्व सोयी सुविधांनी युक्त असे स्वच्छतागृह निर्माण करण्यात आले आहे, असे प्रतिपादन रोटरी क्लब कोल्हापूर मिडटाउनचे डिस्ट्रिक्ट गव्हर्नर नासिर बोरसतवाला यांनी केले. ते श्री शाहू हायस्कूल ज्युनिअर कॉलेज कागल येथे स्वच्छतागृह उद्घाटन समारंभ प्रसंगी अध्यक्षपदावरून बोलत होते.
रोटरी क्लब कोल्हापूर मिडटाउन यांचे वतीने विद्यालयातील मुलींसाठी स्वच्छतागृह बांधून देण्यात आले. त्यांनी केलेले हे कार्य नक्कीच उल्लेखनीय आहे असे प्रतिपादन प्रशालेचे प्राचार्य टी ए पोवार यांनी कार्यक्रमाच्या उद्घाटन प्रस्ताविकेत केले.
यामध्ये सॅनिटरी व्हेंडिंग मशीन व आधुनिक विद्युत सुविधासह मुलींसाठी आरोग्यविषयक सेवा सुविधा पुरविण्यात आल्या. याप्रसंगी कार्यक्रमाचे अध्यक्ष डिस्ट्रिक्ट गव्हर्नर नासीर बोरसतवाला यांनी रोटरी क्लबच्या कार्याचा आढावा घेतला. याकामी शिक्षण प्रसारक मंडळाचे सचिव श्री जयकुमार देसाई , चेअरमन डॉ.मंजिरी मोरे देसाई व पेट्रन कौन्सिल सदस्य श्री .दौलत देसाई यांचे प्रोत्साहन व मार्गदर्शन लाभले . प्रमुख पाहुणे विद्यमान प्रेसिडेंट रोटरीयन शरद पाटील यांनी रोटरी क्लब कोल्हापूर व आंतरराष्ट्रीय नायजेरियन क्लब यांनी या कामासाठी केलेली मदत यांचा प्रमुख उल्लेख केला तसेच माजी डिस्ट्रिक्ट गव्हर्नर संग्राम पाटील यांनीही या प्रकल्पाचा हेतू सांगत भारतामध्ये मुलींच्या आरोग्याच्या तक्रारीच्या दरम्यान असणाऱ्या अपुऱ्या सोयी सुविधामुळे मुलींचे शिक्षणाच्या प्रवाहातून बाहेर पडण्याचे प्रमाण जास्त आहे. त्यांना योग्य सोयी सुविधा मिळाल्या तर मुलींचाही शिक्षणाकडे कल मोठ्या प्रमाणात वाढेल असे मत व्यक्त केले. रोटरियन अनिकेत अष्टेकर यांनी क्लबचे पदाधिकारी व त्यांचे कार्य यांचा परिचय करून दिला. प्रोजेक्ट चेअररमन सौ. उत्कर्षा पाटील यांनी रोटरी क्लब कोल्हापूर मार्फत केल्या जाणाऱ्या कार्याचा आढावा घेतला. तसेच मुलींना आधुनिक आरोग्य विषयक सुविधा वापरण्या संदर्भात मार्गदर्शन केले. व यावेळी प्रशालेस मोफत 1000 सॅनेटरी नॅपकिन प्रदान केल्या. या कार्यक्रमास सौ. रितू वायचळ, अरविंद कृष्णन, प्रशांत मेहता, बी. एस. शिपुगडे, माजी प्राचार्य जे. डी. पाटील, उपप्राचार्या सौ. एस. व्ही. कुडतरकर, पर्यवेक्षक एम. व्ही. बारवडे, तंत्र विभाग प्रमुख एस. यू. देशमुख यांच्यासह शिक्षक, शिक्षिका व शिक्षकेतर कर्मचारी व विद्यार्थिनी उपस्थित होत्या. कार्यक्रमाचे आभार उपमुख्याध्यापिका सौ. एस. एस. पाटील व सूत्रसंचालन सौ. टी. ए. पाटील यांनी केले.
