कोल्हापूर / प्रतिनिधी
मिलींद बारवडे
कोल्हापूर जिल्हा माध्यमिक शिक्षण सेवकांची सहकारी पतसंस्था मर्यादित, कोल्हापूर ( कोजिमाशि) सभासदांना १५ + ९ असा एकूण २४ टक्के दराने रुपये ४ कोटी २८ लाख इतका लाभांश देणार व संस्थेच्या सर्व सभासदांना ए.टी.एम. कार्डचे वितरण करणार असल्याची माहिती चेअरमन बाळ डेळेकर यांनी दिली. कोल्हापूर जिल्हा माध्यमिक शिक्षण सेवकांची सहकारी पतसंस्थेची वार्षिक सर्वसाधारण सभा रविवार दि.२६/०९/२०२१ रोजी संस्थेच्या प्रधान कार्यालयातून ऑनलाईन पध्दतीने संपन्न होणार आहे. सभासदांच्या सर्व प्रश्नांना उत्तरे दिली जातील. जास्तीत जास्त सभासदांनी या सभेत ऑनलाईन उपस्थित रहावे असे आवाहन चेअरमन बाळ डेळेकर यांनी केले आहे.
मार्च २०२१ अखेरच्या आर्थिक वर्षात संस्थेने गरुडझेप घेत ४ कोटी २२ लाख ४ ७२ हजार ५८० इतका नफा झाला असून कोजिमाशि सभासदांना उच्चांकी २४ टक्के लाभांश देणार आहे. संस्थेचा ऑडीट वर्ग अ कायम राखला आहे. या आर्थिक वर्षामध्ये संस्थेच्या ठेवी ४६६ कोटी ३९ लाख ५३ हजार इतक्या असून कर्ज वाटप ३९० कोटी ४१ लाख ३४ हजार इतके केले आहे. संस्थेची गुंतवणूक १६२ कोटी ६९ लाख ८३ हजार असून निधी ३२ कोटी १५ हजार इतका आहे. संस्थेचे भागभांडवल १९ कोटी ४० लाख ६९ हजार इतके आहे.
कोजिमाशि संस्थेने नेहमीच सभासदांचे हित जोपासले आहे. सन २०२०-२१ या आर्थिक वर्षात संस्थेने २ कोटी ८० लाख २३ हजार ४४७ इतके कर्ज कर्जमुक्ती निधीतून मयत सभासदांचे कर्ज माफ केलेचे तज्ञ संचालक दादासाहेब लाड यांनी सांगितले. अभिमान कन्या जन्म व अभिमान कन्यासाडी योजनेअंतर्गत ९३ सभासदांना २ लाख ३२ हजार ५०० रु.चे वाटप केल्याचे चेअरमन बाळ डेळेकर यांनी सांगितले. तसेच ३५१ सभासदांच्या गुणवंत पाल्यांना पारितोषिक व प्रशस्तीपत्र देवून गौरव करण्यांत आला.
सभासद हिताचा कारभार करण्याचा मानस आणि सभासदांची मागणी लक्षात घेवून भाग भांडवल मर्यादा वाढ करणे, नविन सभासद वाढीसाठी सभासद होणेसाठीची पात्रता आदी उपविधी दुरुस्तीसाठी ठेवले असल्याचे चेअरमन बाळ डेळेकर यांनी सांगितले.
कोविड महामारीच्या काळात २८५ सभासदांना रुपये १४ लाख २५ हजारची रक्कम चेकने मदत म्हणून वाटप केली असून पूरग्रस्त शाळा व सभासदांना रुपये १३ लाख २ हजार इतकी अदा केली आहे. त्याचबरोबर जिल्हा आपत्ती व्यवस्थापन समितीकडे २ लाख ५० हजार इतकी रक्कम प्रदान केली आहे. महापूर व कोविड महामारी काळात सभासदांना आर्थिक मदत करणारी कोजिमाशि ही महाराष्ट्रातील एकमेव वित्तीय संस्था आहे.
विमानवारी योजनेअंतर्गत सभासदाला देशांतर्गत विमान प्रवासासाठी रुपये १० हजार व देशाबाहेर विमान प्रवासाठी रुपये २० हजार बिनव्याजी कर्ज उपलब्ध करुन देणारी ही महाराष्ट्रातील एकमेव संस्था असल्याचे चेअरमन बाळ डेळेकर यांनी सांगितले.
असे प्रसिद्धी पत्रक चेअरमन बाळ डेळेकर, व्हा.चेअरमन सुभाष पाटील, तज्ञ संचालक दादासाहेब लाड तसेच सर्व संचालकांनी प्रसिध्दीस दिले आहे.
